Gin-aprubahan sang International Criminal Court (ICC) Trial Chamber III ang pagpadayon sang pag-freeze sang kwarta nga nakumpiska halin kay anay Pangulong Rodrigo Duterte matapos ini madala sa kustodiya sang international tribunal sang Marso 2025.
Ini matapos mag-request ang prosekusyon nga ma-access ang personal nga mga gamit ni Duterte kag mapabilin nga naka-freeze ang bisan ano nga kantidad sang kwarta nga nakuha sa tion sang iya pag-aresto.
Base sa mga dokumento sang ICC nga ginpagwa sang Biyernes, Hunyo 27, 2026, ginpaboran sang korte ang mosyon sang prosekusyon nga ipadayon ang pag-freeze sang nasambit nga pondo.
Ginpakwestyon naman sang kampo ni Duterte ang amo nga tikang, nga nagasiling nga indi na kinahanglan ang amo nga hangyo bangud yara na suno sa ila sa kustodiya sang ICC Registry ang kwarta kag wala ini sang epekto sa nagapadayon nga proseso sang kaso.
Wala ginpahayag sang ICC ang eksakto nga kantidad sang kwarta nga nasamsam halin sa anay presidente.
Nagapangayo man ang prosekusyon sang permiso nga ma-review ang iban pa nga mga gamit nga nakuha kay Duterte sa tion sang iya pag-aresto.
Wala nagapamatok ang depensa sa pagsusi sang pila sini nga mga gamit, apang ginpangabay ni Atty. Peter Haynes nga indi pagpayagan ang pag-usisa sa mga susi kag iban pa nga personal nga butang nga yara sa kustodiya sang ICC Registry.
Suno sa depensa, wala sang igo nga basehan ang prosekusyon nga iugnay ang mga susi sa ginapaimbestigahan nga krimen ukon sa mga propiedad nga may kaangtanan sa kaso.
Ginigiit man sang kampo ni Duterte nga indi dapat magpatigayon sang pagpangita sang ebidensya nga wala pa sang klaro nga basihan. Ginpangabay man nila nga maprotektahan ang pribadong impormasyon ni Duterte kag sang iya pamilya nga wala sang kaangtanan sa imbestigasyon.
