Ginpasiguro ni Ombudsman Jesus Crispin “Boying” Remulla nga padayon nga pangitaon kag bawi-on sang iya talatapan ang ginapatihan nga ill-gotten wealth ukon mga manggad nga nakuha paagi sa ilegal nga pamaagi kag ginpanago sa Estados Unidos.
Ginpahayag ini ni Remulla sa isa ka town hall meeting matapos ang 7th Global Conference on Sustainable Development Goal 16 sa punoan sang United Nations sa New York.
Apang, wala siya nagpahayag sang pangalan sang partikular nga indibidwal ukon mga target sang amo nga operasyon.
Ginpahayag man niya ang nagapadayon nga mga reporma sa Office of the Ombudsman, lakip na ang digital transformation, pagpalig-on sang transparency, kag pakig-angot sa mga overseas Filipinos agud mapabaskog pa ang kampanya batok sa korapsyon.
Nahibaluan nga ginpahayag man ni Remulla sini nga bulan nga ginpabakod sang Ombudsman ang imbestigasyon sa mga ginadudahang iregularidad sa flood control projects, kun sa diin may 209 ka reklamo nga yara sa fact-finding investigation kag apat na ka kaso ang napasang-at sa korte.
Suno kay Remulla, indi dapat mangin taguan sang mga iligal nga manggad ang Estados Unidos, kag kinahanglan ang mas mabaskog nga kooperasyon sa internasyonal nga lebel agud mas mapangabudlayan ang pagpakigbato batok sa korapsyon.
