Ginatun-an sang Philippine National Police (PNP) kon may posible nga impluwensiya ang isa ka online game sa pamatasan sang isa sa duha ka menor de edad nga suspek sa pagpangluthang sa San Jose National High School nga nagresulta sa pagkapatay sang tatlo ka indibidwal.
Suno kay Jayson Capoy, nahibaluan sang mga imbestigador nga nagahampang sang GoreBox ang 14-anyos nga suspek antes natabo ang insidente.
Ang GoreBox isa ka sandbox-style nga online game nga nagalakip sang marahas nga mga eksena kag gore effects. Apang ginpahayag sang kapulisan nga wala pa sang direktang ebidensya nga nagaangot sa hampang bilang rason sang pag-atake.
Sa karon, padayon nga ginausisa sang mga awtoridad ang tanan nga posible nga mga hinungdan sang insidente, lakip na ang ginapaathag nga pagpang-bully nga una nang nabanggit sang mga suspek.
Samtang, nagmando naman si President Ferdinand Marcos Jr. sang maid-id nga imbestigasyon agud mahibaluan ang bug-os nga detalye kag motibo sa likod sang trahedya.
