Nagalaum ang grupo nga Kontra Daya nga sa pagelher sang bag-o nga liderato sang Senado sa idalom ni Senate President Sherwin Gatchalian mangin mas mabaskog, mas organisado, kag mas istrikto ang institusyon kumpara sa nagligad nga pamunuan ni Sen. Alan Peter Cayetano.
Sa interview sang Bombo Radyo Koronadal kay Kontra Daya Convenor Prof. Danilo Arao sang Department of Journalism, UP Diliman, ginpabutyag niya nga importante ang pagpalig-on sang liderato sa Senado agod mapabilin ang kredibilidad sini sa pag-atubang sang mga sensitibo kag importante nga mga isyu sa pungsod.
Suno kay Arao, ginapaabot nila nga sa idalom sang bag-o nga pamunuan mas mapabakod pa ang pagka-“mabaskog kag istrikto” sang Senado, ilabi na sa pagpatuman sang mga proseso kag sa papel sini bilang isa ka mataas nga sangay sang lehislatura nga may responsibilidad nga magpromotar sang transparency kag accountability.
Gindugang man sang propesor ang importansya nga ipakita sang Senado ang “honor and excellence” sa tanan nga proseso sini, lakip na ang nagapadulong nga impeachment trial batok kay Vice President Sara Duterte.
Nagpanawagan man si Arao sa publiko nga magpabilin nga mapanuri sa mga isyung politikal, kilatison ang mga dapat batikuson, kag kilalahon ang mga dapat pagdayawon sa tunga sang nagapadayon nga mainit nga diskurso sa pulitika sa pungsod, ilabi na sa mga isyu nga may direkta nga epekto sa demokratiko nga mga institusyon sang gobyerno.
