Padayon nga ginamonitor sang Philippine Institute of Volcanology and Seismology (PHIVOLCS) ang epekto sang magnitude 7.8 nga linog sa Mindanao sang Hunyo 8, 2026.
Base sa pinakaulihi nga datos sang ahensya sang Hunyo 15, 2026, may kabug-usan nga 6,058 ka aftershocks nga napagkit halin sang nagluntad nga linog.
Sa sini nga numero, 1,451 ang na-plot ukon natumod ang eksakto nga lokasyon, samtang 78 ang nabatyagan sang publiko.
Ang magnitude sang mga aftershocks nagaluntad halin sa 1.2 tubtob 6.4.
Suno sa mga eksperto, ang offshore Sarangani earthquake isa sa pinakamakusog nga napagkit sa rehiyon sa nagligad nga mga tuig.
Nagtuga ini sang temporaryo nga paglikaw sang mga residente sa mga baybayon bangud sang hulga sang tsunami, apang ginbawi man sa ulihi ang tsunami advisory.
Ang Sarangani Bay kag mga kaiping nga probinsya kilala bilang kabahin sang Cotabato Trench, isa ka aktibo nga fault system nga masami nagadala sang mabaskog nga mga linog sa Mindanao.
Sang 2019, asod-asod nga magnitude 6 pataas nga mga linog ang nagluntad sa Cotabato kag Davao Region nga nagtugat sang danyos sa mga bilding kag pangabuhi sang mga residente.
Bisan padayon ang mga aftershocks, ginpahayag sang PHIVOLCS nga wala sila sang nakit-an nga senyales sang volcanic activity nga may kaangtanan sa linog.
Gani, ginapahanumdom gihapon ang publiko nga magpabilin nga preparado kag magsunod sa mga advisories uko abiso sang lokal nga panguluhan.
