Matigdas nga gipanginwala ng kampo ni Leyte Representative Ferdinand Martin Romualdez ang mga pahayag sang Office of the Ombudsman nga siya ang “mastermind” sa iregularidad sa mga flood control projects bangud sa ginalaegar nga pagangkon sang “functional control” sa national budget sang siya pa ang House Speaker sang House of Representatives.
Ginpanindugan ni Atty. Elaine Atienza, tigpamaba ni Romualdez, nga wala sang kamatuoran ang alegasyon kag wala sang isa lang nga opisyal ang may solo nga uyat sa pag-apruba sang pondo ng gobyerno.
Ginpatigayon sang kampo ni Romualdez ang pagpaklaro matapos magpaguwa sang pahayag ang Ombudsman nga nagaangot sa mamalidha sa nasambit nga anomalya base sa iya nangin posisyon sa Kamara.
Paathag ni Atienza, ang national budget ang nagpaidalom sa isa ka maid-id kag “multi-layered” nga institusyonal na proseso.
Nagaumpisa ini suno pa sa iya sa mga ahensya sang Ehekutibo para sa National Expenditure Program (NEP), antes magpaidalom sa makalain-lain nga deliberasyon kag hearing sa Kamara kag Senado.
Nagapaidalom man din ini sa Bicameral Conference Committee ntes ipadala sa Presidente para sa pinal nga pag-apruba ukon pag-veto.
Ginpabugatan sang abogado nga wala sang gahum ang mga mamalidha ukon ang Speaker nga magapguwa sang pondo, magpatuman sang mga proyekto, ukon mag-inspeksyon sa mga natapos na imprastraktura.
Ginpahayag naman ni Atienza nga preparado si Romualdez kag atubangon kag sabton ang tanan nga mga akusasyon pinaagi sa husto nga proseso sang layi.
Bangud sini, nagpaanawagan ang kampo sang mamalidha para sa patas nga pagtratar, kadungan sang pagpahinumdom nga ang pagpanabat sa mga opisyal ang dapat ibase sa mabaskug nga ebidensya kag indi sa mga espekulasyon ukon posisyon sa gobyerno.
