Preparado na ang Commission on Election (COMELEC) South Cotabato sa palaabuton nga Barangay kag SK Elections sa bulan sang Nobyembre sa kasamtangan nga tuig.
Ini ang ginpasiguro ni Atty. Jay Gerada ang Provincial Election officer sa interview sang Bombo Radyo Koronadal.
Suno sa iya, preparado na ang ila nga pamunuan sa tanan nga mga kinahanglanon sa palaabuton nga eleksyon.
Suno pa sa opisyal sa kasamtangan yara sa masobra 653,000 ka mga residente sa South Cotabato ang opisyal nga nakarehistro para makabotar sa Barangay Sangguniang Kabataan Elections (BSKE) 2026.
Ginpahayag ni Gerada nga nagpabilin nga halos pareho ang numero sang registered voters kon ikumparar sa nagligad nga eleksyon.
Gani, apesar padayon ang pagdamo sang mga naga-file sang registration kada election period, may yara man sang regular nga paglimpyo sa voters’ list sang Comelec.
Lakip diri ang pagdula sang mga botante nga nagtaliwan na kag sang mga wala nakabotar sa duha ka magkasunod nga eleksyon.
Base sa rekord sang Comelec, ang Koronadal gihapon ang may pinakadako nga numero sang rehistrado nga botante sa bug-os nga probinsya.
Nagsunod naman ang mga banwa sang Tboli, Polomolok, Surallah, Banga kag Lake Sebu nga nagasunod sa may pinakamadamo nga voters.
Naglab-ot naman sa 127,404 ang kabug-osan nga numero sang mga rehistrado nga botante nga naproseso sang City COMELEC sang Koronadal halin pa sang Oktubre 2025 tubtob Mayo 18, 2026.
Ini matapos makabaton kag makaproseso ang opisina sang masobra 13,000 ka aplikasyon para sa voter registration.
Ginpasiguro naman sang Koronadal City COMELEC nga padayon ang ila pagproseso kag pag-validate sang datos sang mga aplikante agud malikawan ang doble nga rekord kag masiguro nga organisado kag matinlo ang listahan sang mga botante antes ang 2026 elections.
