Nagbuga liwat sang abo ang Bulkang Kanlaon sang Sabado, Marso 21, 2026, matapos magsugod ang ash emission bandang 5:58 sang aga. Nagresulta ini sa abuhin nga panganod nga nagsaka tubtob 500 metros halin sa bunganga kag nagpalapta padulong sa habagat-nakatundan.
Suno sa PHIVOLCS, padayon nga yara sa Alert Level 2 ang bulkan, nga nagakahulugan sang moderate nga aktibidad kag posibilidad sang gulpi nga pagputok. Bangod sini, hugot nga ginadumilian ang pagsulod sa sulod sang 4-kilometro nga Permanent Danger Zone.
Nadokumento man kahapon, Marso 20, ang duha ka ash emission events nga naglawig sang halos duha ka oras, upod sang lima ka volcanic earthquakes. Ang sulfur dioxide emissions naman yara sa tunga sang 434 tubtob 2,021 tonelada kada adlaw.
Padayon ang koordinasyon sang PHIVOLCS sa mga lokal nga panguluhan agod masiguro ang kaluwasan sang mga residente, labi na gid sa habagat-nakatundan nga bahin sang Negros Island nga posible maapektuhan sang ashfall.
Gina-monitor man sang PHIVOLCS ang mga kahimtangan sang iban pa nga aktibo nga bulkan pareho sang Mayon Volcano, Mount Bulusan, kag Taal Volcano, nga permi nagapakita sang mga senyales sang abnormalidad.
