Wala sang plano nga magpatuman sang pagsaka sang plete ang YBL Bus bisan padayon ang pagtaas sang presyo sang gatong sa world market.
Ini ang nangin pahayag ni Bernard Bolanio, Operations Manager sang YBL, sa interview sang Bombo Radyo Koronadal.
Suno lay Bolanio, dako gid ang epekto sang tensyon kag kinagamo sa Middle East sa transport industry bangod nagaresulta ini sa pagsaka sang presyo sang fuel.
Dugang pa kay Bolanio, nga wala pa sila sang ginahimo nga pagsaka sang pamasahe agud maproteheran ang ila mga pasahero. Sa pihak nga bahin, agud makabulig sa pagtipid sang gatong, nagapangita ang kompanya sang mga pamaagi pareho sang pagminos sang paggamit sang aircon sa ila mga bus kag iban pa nga fuel-saving measures.
Gindugang ni Bolanio, naga depende gihapon ang pagpatuman sang pagtaas sang pamasahe sa mandato sang LTFRB, nga amo ang nagaregulate sang plete sa public transportation.
Ginpasiguro man ni Bolanio nga padayon nga ginahatagan ang prayoridad sang YBL Bus ang kaluwasan kag maayo nga kahimtangan sang ila mga pasahero.
