Ibinasura ng United States Senate ang War Powers Resolution na naglalayong higpitan ang kapangyarihan ni Donald Trump na magsagawa ng karagdagang aksyong militar laban sa Iran. Sa botong 47–53, hindi nakapasa ang panukala na sinuportahan ng mga Democrat at ilang independent na senador.
Sa resulta ng botohan, si John Fetterman ang nag-iisang Democrat na tumutol sa resolusyon, habang si Rand Paul naman ang tanging Republican na bumoto pabor dito.
Ayon sa mga sumusuporta sa panukala, layunin nitong pigilan ang White House na magsagawa ng military strikes nang walang pahintulot mula sa Kongreso.
Ito na ang ikalawang pagkakataon sa loob ng isang taon na muling isinulong ni Tim Kaine ang War Powers Resolution na may kaugnayan sa Iran, sa gitna ng tumitinding tensyon at pangamba sa posibleng pagdami ng mga Amerikanong maaaring masawi sa labanan.
Sa kabila ng pagkabigo ng panukala, iginiit ng mga Democrat na mahalagang mapanatili ang sistema ng checks and balances sa kapangyarihan ng pangulo.
Bago pa man ang hakbang sa Senado ng Amerika, naging matindi na ang sagupaan sa pagitan ng United States at Iran simula noong nakaraang weekend. Matapos ang isinagawang pag-atake ng U.S., gumanti naman ang Tehran laban sa mga kaalyado ng Kanluran, kabilang ang Qatar, United Arab Emirates, Saudi Arabia, at iba pang bansa sa Middle East.
