Nagpapatuloy ang imbestigasyon kaugnay sa pamamaril na ikinasawi ni Charlie Kirk, isang kilalang American conservative activist at malapit na kaalyado ni US President Donald Trump, habang nasa isang speaking engagement sa Utah Valley University noong Miyerkules, Setyembre 10.
Ayon sa mga ulat, nagsasalita si Kirk sa ilalim ng isang puting tolda na may mga slogan na “The American Comeback” at “Prove Me Wrong” nang biglang marinig ang malakas na putok ng baril. Tinamaan siya ng bala sa leeg at agad na duguan, base sa mga nakasaksi.
Lumabas din sa social media ang video ng insidente na nagpapakita ng pagbagsak ni Kirk matapos ang pamamaril.
Kinumpirma ni Pangulong Trump ang pagkamatay ni Kirk sa kanyang Truth Social account at inilarawan itong “The Great, and even Legendary.” Kasabay nito, iniutos niya ang pagbaba sa half-mast ng lahat ng bandila ng Amerika bilang pagkilala sa kanyang kaalyado.
Samantala, tinukoy ni Utah Gov. Spencer Cox ang insidente bilang isang “political assassination.”
