Kumpiyansa si Senador Bam Aquino nga daku gid ang mabulig sang Classroom-Building Acceleration Program (CAP) Act agud mapadasig ang pagtukod sang mga classroom sa mga pampubliko nga buluthuan kag masolusyonan ang kakulangan sang mga hulot klasehan sa pungsod.
Ginpaathag sang senador nga kun ini mangin layi, ang Senate Bill No. 121 ukon CAP Act magahatag kahigayunan sa mga local government unit (LGU) kag mga non-government organization (NGO) nga magtukod sang mga classroom suno sa nasyonal nga standard, gamit ang pondo nga magahalin sa national government.
Gin-agda man ni Aquino ang gobyerno nga magpati sa kapasidad sang mga NGO kag mga LGU nga may dedikasyon kag determinasyon nga mapaayo ang kalidad sang edukasyon sa ila tagsa-tagsa ka komunidad.
Ginpaathag liwat ni Aquino ang iya panawagan nga kuhaan ang pila ka bahin sang pondo nga ginabutang para sa mga flood control projects kag ibalhin ini sa sektor sang edukasyon, labi na gid sa mga lugar nga wala man ginabaha.
