Patay ang isa ka 59-anyos nga mangunguma matapos ginbuno sang iya mismo nga bata sa Barangay Centrala, Surallah, South Cotabato alas 5:30 sang kaagahon, Lunes, Hunyo 16, 2025.
Ginkilala ni Surallah PNP Deputy Chief Capt. Eldrin Salarda ang biktima nga si Hernani Magan, pumuluyo sang Sitio Magan, nga amo man ang lugar sang krimen.
Suno kay Salarda, ginpaninguhaan lang ni Magan nga pakalmahon ang iya bata nga si alyas Bonbon, 33-anyos, may live-in partner, kag residente sang Sitio Silangan, nga nagsulod sa ila balay nga nagakagamo.
Nakuha pa sang biktima ang ice pick nga gindala sang suspek, apang nagpalagyo si Bonbon sa balay sang iya lola kag nagkuha sang kutsilyo.
Pag sunod sang amay sa iya, didto na ini ginbuno sa liog, dughan, kag kamot, nga amo ang rason sang iya gilayon nga kamatayon.
Sa inisyal nga imbestigasyon, may yara sang indi pag-intindihanay sa tunga sang mag-amay.
Dugang pa ni Salarda, may nauna na nga record sang pagpamuno ang suspek, matapos niya man suno pa buno-on ang iya mismo nga lola.
Naaresto gilayon si alyas Bonbon sang mga kapulisan nga nagapadulong sa lugar samtang nagapatrolya.
Padayon subong ang paghulat sang Surallah PNP sa desisyon sang pamilya kon magsaka sila sang kaso batok sa ila paryente.
