Duha ka magkalain-lain nga insidente sang self-accident ang nagluntad sa sulod sang isa ka oras sa barrio 2, Koronadal City sang kaagahon sang Mayo 17.
Una nga insidente natabo pasado alas 3:30 sang kaagahon kun sa diin ginkilala ang biktima nga si Redwin Marcellino, 23 anyos, residente sang Barangay New Pangasinan, Koronadal City.
Suno sa imbestigasyon, si Marcellino ang nagamaneho sang Honda Beat Mio nga motorsiklo halin sa Barangay Hall sang Barrio 2 padulong sa ila lugar sa New Pangasinan.
Ginkumpirmar nga naka-inom ini sang makahulubog nga ilimnon kag natulogan samtang naga maneho nga amo ang gintunaan sang aksidente.
Wala lang nagdugay, pasado alas 4:30 sang kaagahon, isa naman ka self-accident ang nagluntad sa pareho nga baranggauy.
Ginkilala ang biktima nga si Jamill Bataga, 22 anyos, residente sang Esperanza, Koronadal City.
Base sa report, nag-overtake si Bataga sa isa ka fish delivery vehicle apang natabo ini sa kurbada nga bahin sang dalan kag madulom pa gid ang palibot rason nga nag-diretso ini sa kanal.
Pareho ang mga biktima nga wala sang helmet sang matabo ang aksidente, rason sang grabe nga pilas sa ila mga ulo kag nawong.
Ginrespondehan gilayon ang duha ka insidente kag gilayon man nga gindangat ang mga biktima sa pinakamalapit nga balay-bulongan.
Sa karon, padayon ang ila pagpaayo.
Padayon man ang panawagan sang mga otoridad sa tanan nga motorista nga magpanalgan, indi magmaneho kun hubog, kag pirmi magsuksok sang helmet agud malikawan ang seryoso nga mga insidente sa dalanon.
