Napatay ang isa ka notoryus nga suspek nga miyembro sang isa ka organized crime group matapos ini magbato sa ginpatigayon nga joint law enforcement support operation sang mga otoridad sa Sitio Dulayap, Barangay Panggao, Barira, Maguindanao del Norte, pasado alas-5:00 sang aga, Mayo 5, 2025.
Ini ang ginkumpirma ni LtCol Roden Orbon kag spokesperson sang 6ID Philippine Army sa interbyu sang Bombo Radyo Koronadal.
Ginkilala ni Lt. Col. Roden Orbon, ang napatay nga si Kamlon Manardas Ragundo, 34-anyos kag residente sang amo nga lugar.
Suno sa iya, katuyuan sang Criminal Investigation and Detection Group – BARMM, upod ang MBLT-2, nga ihatag ang warrant of arrest nga gin-issue sang lokal nga korte batok kay Porok Marandakan Ragundo, alyas “Rokkie,” kag pito pa ka mga kaupdanan niya bangud sang nagkalain-lain nga kaso kriminal nga ginapangatubang sang ila grupo.
Sa tunga sang engkwentro, nakatakas suno pa ang iban nga mga suspek kag nabilin ang bangkay ni Kamlon Ragundo sa lugar sang insidente. Naglabog pa sang granada ang mga suspek samtang nagapalagyo.
Narekober sa lugar ang duha ka M16A1 rifle, mga magasin, duha ka granada, kag mga bala.
Dugang pa niya, ang grupo ni Ragundo dugay na nga ginahimo ang nagkalain-lain nga krimen upod na ang gun-for-hire, pagpangawat nga may bayolente, kag pagbaligya sang ilegal nga droga.
Ginpahayag niya man nga ang mga aktibidad sang grupo nagapadayon nga nagahatag kahadlok sa mga pumuluyo sang Barira, Matanog, Parang, Sultan Mastura, kag Buldon sa Maguindanao del Norte, upod man ang Cotabato City
