Naghimo sang mock ukon simulated election ang Commission on Elections ukon Comelec sa Barangay Rebuken, Sultan Kudarat, Maguindanao del Norte sang Hunyo 27 bilang kabahin sang pagpanghanda para sa kauna-unahang parliamentary elections sang Bangsamoro Autonomous Region in Muslim Mindanao ukon BARMM nga natalana sa Setyembre 14, 2026.
Gindumalahan ang mock election sa Rebuken Elementary School sa pagpanguna ni Comelec Chairman George Erwin Garcia kag BARMM Regional Election Director Ray Sumalipao.
Tumong sang aktibidad nga tistingan ang bug-os nga proseso sang eleksyon, lakip ang pagboto kag pagproseso sang mga balota paagi sa validation machine.
Nagtambong man sa aktibidad ang mga representante sang Police Regional Office-BAR, 6th Infantry Division sang Philippine Army, mga peace advocacy groups, mga representante sang nagkalain-lain nga partido, kag pila ka mga opisyal sang Bangsamoro Parliament bilang mga tig-obserbar.
Suno kay Garcia, nangin hapsay kag madinalag-on ang ginpatigayon nga mock election kag ginpasalamatan niya ang nagkalain-lain nga sektor nga nagbulig agud mangin maayong ang pagpanghanda para sa palaabuton nga eleksyon.
Ginpabutyag man sang Comelec nga padayon nga pagatumanon ang pinaka-una nga BARMM parliamentary elections sa Setyembre 14, 2026 suno sa natalana nga iskedyul.
Ang mock election kabahin sang padayon nga pagpanghanda sang Comelec agud masiguro ang malinong, hapsay kag masaligan nga eleksyon sa Bangsamoro region.
