KORONADAL CITY –
Bilang kabahin sang iya adbokasiya sa pagpalapnag sang gahum sang panulatan, ginbisita kag ginsuportahan ni Palanca Hall of Famer kag University of the Philippines Most Distinguished Alumni Peter Solis Nery ang mga manunulat sang South Cotabato sa pagpanghanda para sa National Arts Month 2025.Sa eksklusibo nga interbyu, ginpabutyag ni Nery ang iya pagpanghangkat sa pagsuporta sa mga manunulat sang rehiyon, nga nagapadayon sa pagdihon sang pungsodnon nga literatura.
“Kinahanglan buligan naton ang mga manunulat halin sa rehiyon bangod sila ang nagahugis sang aton literatura. May talento sila nga dapat makilal-an sang mas madamo pa,” pahayag ni Nery.Ginhatagan man niya sang punto ang importansiya kag bili sang pagsulat sa pagtipig kag pagpaambit sang mga sugilanon sang komunidad.“
Ang papel sang isa ka manunulat indi lang magsulat kundi magtipig kag magpaambit sang sugilanon nga dapat mabasahan man sang masunod nga henerasyon,” dugang pa niya.Bilang isa ka premyado nga awtor, ginpakita man ni Nery ang iya kabakod sa pagtib-ong sang panulatan sa rehiyon. Ginpasalamatan niya ang Provincial Government of South Cotabato sa pagpahibalo sang ilang suporta sa mga manunulat kag sa pagpatigayon sang mga programa nga nagapabakod sang taliambong sa probinsiya.“Nalipay ako nga ginahatagan na sang tsansa ang aton mga manunulat nga makilala. Kabahin ini sang mas daku pa nga tikang sa pagpabakod sang panulatan sa rehiyon,” iya ginpahayag.
Si Peter Solis Nery, nga nahauna nga nagrepresenta sang Pilipinas sa Sharjah International Book Fair, isa ka bantog nga mamalaybay, piksiyonista, kag filmmaker halin sa Dumangas, Iloilo.Sa tema nga “Ani ng Sining, Diwa at Damdamin,” ang National Arts Month isa ka tuigan nga selebrasyon sang patubas sang taliambong sa patag sang literatura, musika, pagsaot, visual arts, kag iban pa.
Via: Bombo Correspondent Pete Pregonir
