KORONADAL CITY – Nagasinggitan sa karon sang hustisya ang pamilya sang napatay nga ginaalegar drug suspect nga suno pa nagbato sa mga kapulisan sa COMELEC checkpoint sa Barangay Namnama, Koronadal City.
Sa interview sang Bombo Radyo Koronadal kay Sara Datukan, asawa sang suspek nga si alyas “Yan-yan” nga taga Brgy. Tamnag, Lutayan, Sultan Kudarat, ginpahayag sini nga wala sang sala ang iya nga bana kag inosente ini.
Ginpahayag pa ni Sara ngna naguwa sa ila puluy-an kag nagpadulong sa Koronadal ang iya nga bana agud nga mangita sang makaon rason nga nakaagi ini sa Comelec checkpoint sa bahin sang Brgy.Namnama, Koronadal City.
Dugang pa sini, nagapangsubo sila sa natabo sa iya nga bana bangud indi suno pa makatarungan ang pagpatay sa iya nga wala man sang malain nga tinutuyo sa pag-agi sa checkpoint sang Koronadal.
Nagatalalangison man ini bangud nadulaan sang amay ang iya ginadala nga lapsag.
Madumduman nga nag-angkon sang pila ka mga negatibo nga komento ang pahayag sang Barangay Kapitan sang Brgy. Namnama kag hepe sang Koronadal angot sa detalye sang natabo sa checkpoint kun diin gin-insister sang mga ini nga nagpalag ang suspek sa mga kapulisan rason nga natiruhan ini.
Lain naman ang bersyon sang pamilya bangud indi sila magpati nga nagbato ang suspek kag may dala nga illegal nga droga.
Ginakwestiyon man sang mga ini kun ngaa sa ulo ang igo sang ila himata kag indi sa iban nga parte sang lawas sini.
Magluwas sini, ginpanindugan man sanng pamilya Datukan nga may nagakaigo nga dokumento ang motorsiklo nga ginamaneho sang suspek apang wala lamang sang plate number bangud bag-o lamang ini nabakal kag ginaproseso pa.
Sa subong nagapanawagan ang pamilya sang suspek sa pamunuan sang mga kapulisan nga ipaguwa ang CCTV footage sa insidente.
Samtang, welcome naman sa kapulisan ang nasambit nga reklamo sang pamilya.
Suno kay PLt.Col. Hoover Antonio,hepe sang Koronadal City PNP, nakahanda sila nga atubangon ang anuman nga reklamo sang pamilya.
Sa pagkamatuod nagpatigayon man suno pa sang separar nga imbestigasyon ang mga ini sa natabo.
Sa pihak sini, ginatindugan sang kapulisan nga isa ka lehitimo nga operasyon ang nagluntad.
