May mga persons of interest nga ginasundan sang kapulisan sa natabo nga pagpatay sa assistant election officer sang banwa sang Isulan Sultan Kudarat.
Ini ang ginpahayag ni PLt. Gladys Novino, admin officer sang President Quirino PNP sa interbyu sang Bombo Radyo Koronadal.
Ginakilala ang biktima nga si John Nico Allan Dionaldo Pandoy, may asawa, Assistant COMELEC Officer sang Isulan, Sultan Kudarat kag residente sang Purok Sampaguita, Brgy. Poblacion, President Quirino, Sultan Kudarat.
Natabo ang pagpamusil alas 4:18 sang hapon sa bahin sang National Highway, Purok Sampaguita, Poblacion, President Quirino, Sultan Kudarat.
Suno kay Novino, nagguwa sa ila imbestigasyon nga pauli na kuntani sa iya balay si Pandoy sakay sang iya Yamaha Mio Gear, kolor itom sang sundan ini sang duha ka lalaki nga sakay man sang motorsiklo.
Pag-abot sa lugar, diri na ginpamusil ang biktima gamit ang wala pa makilala nga armas.//Madasig nga nagpalagyo ang mga gunman sakay ang ila get away vehicle padulong sa direksyon sang Buluan, Maguindanao del Sur.
Gilayon man nga gindala sa malapit nga ospital ang biktima pero gindeklarar nga patay na sang attending physician.
Sa karon, padayon ang pagpangolekta sang ebidensya sang mga otoridad agud matukiban ang identidad sang mga kriminal nga nagpatay kay Pandoy.
Ginahibalo naman kon may kaangtanan sa iya trabaho ukon personal grudge ang motibo sa pagpatay sa biktima.
Una diri, ginpahayag ni PMajor Rissa Hernaez, tigpamaba sang PNP Region 12 nga handa ang kapulisan sa ano man nga posible nga kapintas ukon election related incident nga matabo ilabi na nga palapit na ang eleksyon.
Ginahugtan naman nga ginkondena sang Comelec Isulan ang nahitabo nga pag pangluthang patay.
