Aminado ang supermodel nga si Naomi Campbell nga may yara sia sang kakulangan bilang trustee sang Fashion for Relief, isa ka chartitable organization kon sa diin isa man sia sa mga nagpatukod, suno sa mga media reports sang Biyernes, Oktubre 4, 2024.
Apang ginsiling ni Campbell nga wala sia naghiwat sang “financial misconduct” ukon ang paggamit sang iya charity para sa iya personal nga interes.
Sang nagligad nga semana, ginpamatukan si Campbell nga mangin trustee sang nasambit nga organisasyon sa sulod sang lima ka tuig matapos nahibaluan nga gingamit ang iban nga pondo sa pag-avail sang spa treatments kag sigarilyo.
Ginpatukod ni Campbell ang Fashion for Relief sang 2005 bangod sa luyag sini nga makatipon sang pondo para sa mga”humanitarian causes” paagi sa paghiwat sang mga runway shows.
Apang sang sini nga tuig, gin-ukas ang nasambit nga organisasyon sa Britain’s list of charities.
Sa ginhiwat nga inquiry sang Charity Commission, nakit-an sang grupo ang nanari-sari nga mga insidente sang “misconduct” kag “mismanagement”. Bangod sini, gin-ban si Campbell kag ang duha pagid ka trustrees.
Halin 2016 tubtob 2022, nadiskobrehan nga 8.5% lang sang Fashion for Relief ang gin-alokar para sa mga charitable grants.
Samtang may yara sang unauthorized payments nga 290,000 pounds ($388,000) nga ginhatag sa isa sa mga trustees. Magluwas diri, natukiban man nga gingasto ang iban nga kwarta sa room service, spa treatments, kag mga sigarilyo.
