Nagpaguwa sang cease and desist order ang Regional Trial Court Branch 15 sa Ecoland, Davao City sa kapulisan nga nagamandu nga untaton na ang operasyon sa sulod sang KOJC compound kag kakason naman ang mga barriers ukon barikada sa entrada nga bahin sang compound.
Suno sa Davao RTC nga ang ginhimo nga operasyon sang kapulisan ang isa ka klaro nga pagbayular sa katungod sang religious sector kag sang mga myembro sini.
Nahibaluan nga ang isa sa mga abogado sang KOJC nga si Atty. Israelito Torreon ang nagsang-at sang Temporary Restraining Order sa sa Korte kaina sang udto kag tigayon ini nga naaprubahan subong nga hapon.
Bangud sini, gilayon nga ginkakas sang kapulisan ang ila barikada sa dalanon sa atubang mismo sang KOJC gani nagakaagi na sang matawhay ang mga salakyan.
Magluwas sini, makit-an man nga nagayuhom mangin ang kapulisan nga nakadeploy sa sulod kag guwa sang KOJC compound bangud makapahuway na ang mga ini matapos ang apat ka adlaw nga stand-off.
Madumduman nga nagsugod ang operasyon sang kapulisan sa KOJC compound sang tinalikdan nga Sabado sang kaagahon kun diin igaserbe sang mga ini ang warrant of arrest kay Pastor Apolo Quiboloy kag sang iban pa nga akusado sa kaso nga child abuse, sexual abuse kag human trafficking apang naabtan lamang sang ikaapat ka adlaw wala sa gihapon ang mga ini makita.
Ang operasyon sang kapulisan sa KOJC compound ang ginpangunahan ni PNP XI Regional Director BGen. Nicolas Torre III kaupod ang kapin 3000 ka mga tinawo sini.
