KORONADAL CITY – Hustisya naman ang ginasinggitan sang pamilya sang mga napatay matapos nga tiruhon kag agawan sang motorsiklo sang ginabulubanta 7 ka mga armado nga motornappers sa banwa sang Tantangan, South Cotabato.
Suno kay Ginang Flora Labuteng, bayaw sang una nga nangin biktima sang pagpangluthang nga si Levimar Moderacion, 33-anyos, may asawa kag residente sang Barangay Paraiso, Koronada City, dapat nga madakpan kag mapasabat sa ila ginhimo ang mga responsable sa krimen.
Masakit suno pa sa ila pamilya ang natabo bangud kahappon nga adlaw sang Domingo, nakaupod pa nila sa pagsimba kag pagkaon ang biktima nga si Levimar kag wala ginalauman nga mapatay na ini pagkahapon.
Sa karon, trauma kag kasakit ang nabatyagan sang asawa sang biktima bangud sa natabo.
Gani, nagahingyo sila sa mga kapulisan nga himuon ang tanan nga paagi agud nga madakpan ang mga motornappers.
Emosyunal pa gani ini sa pagpahayag nga kuntani gin-agaw na lamang ang motor sang biktima kag wala na lang ini ginpatay pa.
Madumduman nga sakay sang motorsiklo ang biktima nga si Levimar kaupod ang asawa sini sang pag-abot nila sa Barangay Tinongcop, ginbalabagan ang mga ini sang kalalakihan nga nakamotorsiklo, gilayon nga gintiro kag gin-agaw ang raider nga motorsiklo sini.
Nahibaluan nga 3 ang motorsiklo nga nakuha sang mga motornappers kag duha ang napatay lakip na si Levimar kag ang isa ka Grade 12 nga si Darll NuquI.
