KORONADAL CITY– Nakit-an na sang kapulisan ang isa ka bag-o bun-ag nga lapsag nga nadula matapos masapwan sa basurahan sang Prk. Sulatre, Brgy. Zone III, Koronadal City pasado alas 6:30 kaina sang aga, Agosto 7, 2024.
Suno kay Ginang Monalisa Sibug, Purok president sang Purok Sulatre, Brgy. Zone 3, Koronadal City, una nga nakita ang lapsag nga nakabutang sa sulod sang eco bag nga may pusod pa kag ginhungod nga ibilin nga nakabalot pa sa lampin.
Nagtawag suno pa gilayon si Ginang Sibug sa kapulisan agud e-report ang nasapwan nga lapsag apang wala pa makaabot ang mga pulis may nagkuha na nga isa ka lalaki kag gindala ini sa isa ka pribado nga hospital.
Apang matapos ginpaidalom sa medikasyon ang bata ginpaguwa ini sa hospital kag gindala sa Brgy. Saravia bangud may kilala suno pa ini nga nurse nga magaatipan sang lapsag.
Nahibaluan nga plano suno pa kuntani sini nga adoptaron ang lapsag apang wala mag-agi sa nagakaigo nga proseso.
Sa subong ginpadulungan na sang Koronadal PNP kag CSWDO ang Brgy. Saravia agud bawion ang lapsag matapos ma-locate ang ginahamtangan sini sa bulig sang pila ka residente.
Sa karon, ginahibalo pa sang kapulisan kun sin-o ang ginikanan sang lapsag nga naghaboy sini sa basurahan.
