Naglab-ot sa 22 sa 23 ka mga senador ang nagpirma sang resolusyon nga nagaduso agud temporaryo ipa-iway ang pagpatuman sang Public Utility Vehicle Modernization Program (PUVMP), nga ginatawag na sa karun nga Public Transport Modernization Program (PTMP).
Tanan nga senador magluwas lang kay Senadora Risa Hontiveros ang nagpirmar sa ginaduso nga Senate Resolution 1096.
Nasaad sa resolusyon nga ipa-iway ang pagpatuman sang amo nga programa samtang ginaresolba ang mga concerns sang mga apektado nga mga drivers kag mga grupo para mangin epektibo kag inclusive ang implementasyon sang PTMP.
Para sa mayoriya sang mga senador, kinahanglan mahatagan anay sang kasanagan sang Department of Transportation ang mga palamangkutanon kag reklamo sang apektado nga sektor antis hugot nga ipatuman ang programa.
Nahibaluan nga ginsuguran ang PUVMP sang tuig 2017 nga may katuyuan nga islan ang dumaan nga mga jeepneys sang Euro 4- compliant engine nga mga salakyan agud mapahaganhagan ang polusyon kag maislan ang mga daan nga salakyan sang mga roadworthy nga makapasar sa standards sang Land Transportation Office.
Gina-obliga man ang mga drivers kag operators nga magsulod sa kooperatiba kag maka-apply ang mga ini sang prangkisa bilang isa na ka transport cooperative.
