KORONADAL CITY – Patay ang isa ka babaye samtang kritikal ang kondisyon sang kaupod sini sang maigo sang kilat samtang nagapanilong sa isa ka waiting shed sa Pandag, Maguindanao del Sur.
Suno kay Police Lieutenant Ernesto Rivera sang Pandag municipal police station, ginkilala ang napatay nga si “Ellaine” kag ang kaupod naman sini nga napilasan amo si “Anna” lunsay residente sang Carmen, Cotabato province.
Nahibaluan nga sakay sa motorsiklo ang mga ini padulong sa Tacurong City sang maabtan sang bunok nga ulan rasun sang pagpanilong sa waiting shed sa atubang sang Kayaga Elementary School.
Matapos maigo sang kilat, gindala pa sang mga otoridad sa ospital ang mga biktima, apang gindeklarar na nga patay si Ellaine kag padayon naman nga ginabulong si Anna.
