KORONADAL CITY – Ginpaidalom sa Enhanced Comprehensive Local Integration Program ukon E-Clip ang 4 ka mga katapu sang local terrorist group nga BIFF Karialan Faction nga boluntaryo nga nagsungka sa mga otoridad sa siyudad sang Koronadal.
Ini ang ginpahayag ni PLt. Col. Hoover Antonio, hepe sang Koronadal City PNP sa interview sang Bombo Radyo Koronadal.
Ginkilala ni PLt.Col. Antonio ang mga nagsungka nga sanday alyas “Mal”, 38 anyos; “Pogi”, 39 anyos; “Eps”, 34 anyos; kag “Junrex”, 31 anyos lunsay mga mangunguma nga residente sang Pikit, North Cotabato.
Suno kay Antonio nagsungka ang mga ini siyudad sang Koronadal matapos ang malawig nga proseso kag madugay nga negosasyon sa mga intelligence unit sang PNP.
Paathag pa ni Antonio, nagsungka ang anay mga rebelde sa Koronadal bangud sa kumpiyansa sa peace and order situation sa siyudad kag pagpati nga mangin maayo ang ila nga pagsungka diri.
Dugang pa ni Antonio, sa pagsungka sang mga ini dala nila ang mga armas kasubong sang 2 RPG, 1 barret firearm kag 1 M1 garand rifle.
Kaangot sini, nagpanawagan man si Antonio sa mga nabilin pa nga Local Terrorist Group nga magbalik sa sabak sang gobyerno kag magpaidalom man sa E-CLIP.
