KORONADAL CITY – Naglab-ot na sa 9,042 ang dengue cases nga napagkit sang Department of Health (DOH 12) gikan sang Enero tubtob Hunyo 15 sini nga tuig 2024.
Suno kay DOH 12 Regional Mosquito Borne Disease Coordinator Royfrextopher Boholst, ini ang mas mataas sa 6,275 dengue cases sa rehiyon sa kasubing nga tion sang nagligad nga tuig.
Dugang pa sang opisyal, ang may pinakadamo nga kaso sang dengue sa rehiyon dose ang probinsiya sang Cotabato nga naglab-ot sa 3,541; nagsunod ang South Cotabato nga may 1,840; Sultan Kudarat nga may 1,348; Sarangani nga yara sa 1,303 kag General Santos City nga naglab-ot sa 1,046.
Ginkumpirmar man ni Boholst nga 15 na katawo ang napatay bangud sang Dengue sa Cotabato, 7 sa South Cotabato, 5 sa Sultan Kudarat, 4 sa Gensan kag isa sa Sarangani.
Wala na suno pa sa cyclical pattern nga kada 3 taon ang dengue rason nga indi na gilayon ini ma-predict.
Kaangot sini nagapanawagan ang opisyal sa publiko nga ipatuman ang clean-up drive sa mga komunidad ilabi na sa mga lugar nga ginhalinan sang dengue.
Ini bangud ang paglimpyo sa mga breeding ground sang mga lamok nga nagadala sang dengue ang mahimo nga limpyuhan agud nga indi na magdamo pa.
