Ginkakas na sang National People’s Coalition (NPC) si suspended Bamban, Tarlac Mayor Alice Guo, gikan sa listahan sang ila nga mga miyembro bangud sa mga akusasyon nga involbado ini sa ilegal nga Philippine offshore gaming operator (Pogo) hub sa ila nga banwa.
Sa sulat nga may petsa nga Hunyo 22, ginmanduan ni NPC chairman kag anay Senate President Vicente “Tito” Sotto III ang order matapos magbaton sang petisyon gikan kay Tarlac Gov. Susan Yap.
Sa sulat sini, una na nga ginpahayag ni Yap nga indi makahatag si Guo sang compelling evidence nga makapamatuod nga wala sang kamatuoran ang mga pasibangod batuk sa iya.
Sandig sa mga sulat, ginamandu sang Office of the Ombudsman ang suspensyon ni Guo matapos ang mga reklamo nga ginpasaka sang Department of Interior and Local Government (DILG).
Magluwas sini, nagfile man sang kaso ang Philippine National Police – Criminal Investigation and Detection Group kag ang Presidential Anti-Organized Crime Commission ng qualified human trafficking batuk kay Guo bangud sa alegasyon nga konektado siya sa labor trafficking sang halos 500 dumuluong nga Pogo workers.
Ginmanduan man sang DILG ang National Police Commission sang Mayo 20 nga e-revoke ang deputization ni Guo sa iya nga nasakupan nga lugar bangud sa pareho nga rason.
