Nagpaandam ang Philippine Institute of Volcanology and Seismology (Phivolcs) sa paglikaw ukon pagpalayo sa four-kilometer Permanent Danger Zone (PDZ) labi na sa palibot sang Bulkang Kanlaon.
Ini apisar pa nga nagnubi na ang aktibidad sang nasambit nga bulkan.
Suno kay Phivolcs director Teresito Bacolcol, kinahanglan sa gihapon sang istrikto nga pagdumili sa mga tawo nga magsulod sa PDZ agud malikawan ang anuman nga aksidente tuga sang pagbuga sang bulkan.
Ginhingyo man ni Bacolcol ang bulig sang mga local government units nga yara sa palibot sang bulkan para sa hugot nga implementasyon sini.
Kalakip sa mga gintumod sang direktor ang mga lugar sang Ara-al kag Yubo sa La Carlota City; Sag-ang, Mansalanao, Cabagnaan kag Biak na bato sa La Castellana; Minoyan, Murcia; Masolog, Pula kag Lumapao sa Canlaon City subong man ang brgy. Codcod, San Carlos City.
Paathag pa ni Bacolcol nga ang una nga pagsigabong sang bulkang Kanlaon ang posible nga matabo liwat..
Mataas man suno pa ang pamahog sang mga volcanic hazards kasubong sang PDCs (pyroclastic density currents) kag mga ballistic projectiles.
Kadungan sini ginlaygayan sang director ang mga Civil aviation officials nga dumilian ang mga eroplano nga magpalapit man sa baba sang bulkan.
