KORONADAL CITY – Naglab-ot sa apat ka mga panimalay kag isa ka day care center ang naguba sa pagpanalasa sang mabaskog nga hangin ukon buhawi sa banwa sang Tupi, South Cotabato.
Ini ang ginkumpirmar ni Mr. Emil Sumagaysay, Municipal Disaster Risk Reduction and Management Officer (MDRRMO) sa interview sang Bombo Radyo..
Suno kay Sumagaysay, magluwas sa naguba nga mga puluy-an, madamo man nga pananum kasubong sang mga puno sang kahoy kag kapayas ang nagkalatumba.
Sa karon, ginahibalo pa ang kabug-usan nga ektarya sang kapayas kag iban pa nga pananum nga nadalasa sang buhawi.
Apang, ginpasiguro man sang opisyal nga may nakapreparar nga pundo para sa paghatag sang bulig sa mga apektado nga pamilya.
Nahibaluan nga nagtuga sang trapiko sa dalanon ang pagkalatumba sang kahoy sa highway matapos magpanalasa ang buhawi apang gilayon nga ginpatigayon ang clearing kag nangin passable naman ang dalan.
Nadulaan man sang kuryente ang Barangay Palian kag Lunen bangud may naapektuhan nga linya sang kuryente apang na-balik man ini sang Socoteco 1 matapos ang pila ka oras.
