Nagatulog na lamang sa dalanon ang mga tawo sa Morocco bangud sa kakulba nga matiphagan sa tion nga may matabo nga aftershock kasunod sang pagtay-og sang 6.8 magnitude nga linog sa High Atlas Mountain.
Sa pinakaulihi nga data nagikan sa interior ministry, nagdangat sa 2,012 ka mga tawo ang nagkalamatay samtang kritikal ang kondisyon sang 1, 404 ka iban pa.
Suno kay Bombo Marilyn Sioson, International Correspondent sa Morocco, mangin ang mga residente sa Casablanca, apat ka oras nagikan sa epicenter, ang nakabatyag man sang mabaskog nga linog.
Sa pagkamatuod suno sa iya, nahulog sa kama ang iya kaupod samtang nga nagakatulog.
May napatay man sa nasambit nga lugar matapos gin-atake sa tagipusu-on bangud sang kakulba. Wala sang may nagluntad nga aftershock apang ginakabalak-an sang mga residente nga may yara sang matabo base man sa ila nabatian.
Bangud sini, gina-agwanta nila ang tun-og agud lamang nga mangin safe sila sa tion nga may magluntad nga aftershock.
Samtang, nagapadayon man ang pagtinlo sang gobyerno sa mga lugar nga apektado sang linog ilabi na sa epicenter. Nanugunan man ang mga opisyal bangud madamo sang manami nga istruktura sa Marrakesh ang ginguba sang mabaskog nga linog.
