Isa ka Japanese Company naglunsar sang isa ka sahi sang vertical pods kun sa diin ang sin-o man ang pwede na makatulog nga nakatindog.
Ini ang ginatawag nga Giraffenap, isa ka panibag-o nga estilo sang sleeping pod nga nagaganyat para sa power naps ukon sang makadali nga pagtulog bilang pamaagi nga makapaayo para sa mga empleyado nga maka-konsentrar sa ila sini nga trabaho.
Kung mahibaluan, kilala ang Japan nga hardworking country nga nagahatag sang pagtamod ukon dedikasyon sa tagsa ka trabaho kag sa ikaayong lawas sang ila sini nga mga empleyado. Agud mahagan-hagan ang kasakuon kag ang kakapoy sa trabaho, pila ka mga Japanese workers ang nagapatigayon sang ‘catnap’, ‘short power naps’ ukon piyong-piyong sang makadali. Ini nga bagay sa nahibaluan makapabalik sang ‘energy levels’ kag concentration sa trabaho sang isa ka empleyado.
Agud mangin mahapos para mga tawo nga makapatigayon sang ‘power naps’, isa ka kumpaniya sa Japan nagsugod sa pag-instolar sang ila gin-imbento nga vertical sleeping pods ginatawag nga Giraffenap’ sa tanan nga mga coffee shop sa bug-os nga pungsod.
Isa sa mayor nga rason kun nga-a ginhimo ang Giraffenap pods sang patindog amo ang ‘space’ kun sa diin mahapos ang mga ini i-install sa mga magagmay nga kapehankag restaurants. Kag kun nga-a naka-stand-up position ang nasambit nga pod? Ini bangud mahapos para sa isa ka persona nga nagagamit sang pod nga makabugtaw kun ipaanggid sa nakahigda bangud ini ang may alarm system.
Kun nga-a ini ang ginatawag nga Giraffenap? Ini nagatumod sa sapat nga Giraffe nga kun magtulog nagatindog.
