KORONADAL CITY – Magapanagtag sang libre nga disinfectant batok African Swine Fever (ASF) ang pamunuan sang Koronadal City Veterinarian Office agud nga mahatagan sang dugang proteksyon ang mga backyard hog-raiser kag ang ila nga mga hinuptan nga mga kasapatan.
Ini ang nangin pahayag ni Dr. Charlemagne Calo, Koronadal City Veterinarian sa interview sang Bombo Radyo Koronadal.
Suno sa iya, libre nga ipanghatag sang City Vet ang mga bulong para mas mapasangkad pa ang biosecurity sang mga backyard hograisers.
Ang mga interesado nga magpangayo nga mga individual ang mahimo magpadulong sa demo farm sang Koronadal City Vet sa bahin sang Purok Ferry Barangay GPS, Koronadal City, South Cotabato kag magdala sang surudlan para mahatagan ang mga ini sang bulong halin sa drum nga ila stock.
Madumduman nga ara sa high risk sa subong ang syudad sang Koronadal sang ASF bangud man sa pagkapositibo sang pila ka mga baboy sa mga banwa sang Surallah kag Banga nga malapit lang sa Koronadal.
