KORONADAL CITY- Ginpakigbahin sang isa sa mga biktima sa pagsigabong sa isa ka unit sang Rural Transit Bus sa Barangay Making Parang Maguindanao ang ila nga naekperyensyahan nga kakulba sa nasambit nga panghitabo.
Sa interview sang Bombo Radyo Koronadal Kay Coach Benjamin Wahab, Coach sang BARMM Sepak Takraw Association ginpahayag sini nga tubtub sa subong wala pa madula ang kasakit sang ila nga talinga kag mga pilas nga tuga sang pagsigabong sang IED nga nahamtang gid mismo sa ila nga ginapungkuan.
Suno sa iya, nakasay sila sa amu nga yunit nga bus bangud magapadulong sila sa Dipolog City para mangin representante sang National Invotational Sports Competition sang Sepaktakraw bilang isa ka imbitado nga sepaktakraw club sa BARMM kaupod sini ang 4 pa ka mga menor de edad.
Apang wala gid sila magdahom nga indi sila makatambong sa nasambit nga lugar bangud sa nasambit nga insidente.
Suno pa sa iya, tuman ka kibot ang ila nga nabatgayan bangud sa panghitabo kag naka-angot sang pilas sa lawas ang pila sa mga pasahero lakip na ang isa nila ka upod sa diin na-utdan gid sang 2 ka tudlo bangud sa panghitabo.
Dugang pa sini, masuwerte suno pa sila nga sa dalom ang trajectory sang shrapnel kabangdanan nga wala sila napurohan .
Sa subong , naga laum na lamang sila nga madakpan ang mga suspek nga ara sa likod sini para pakuha ang hustisya para sa ila nga mga biktima.
