KORONADAL CITY-Dalayon nga na-neutralize sang mga otoridad ang ginkabig nga most wanted terrorist leader sang Daulah Islamiya Terror Group kag asawa sini sa ginpatigayon nga operasyon sang mga otoridad sa bahin sang Talayan, Maguindanao.
Ini ang ginkumpermar ni Lt.Col. John Paul Baldomar,tagpamaba sang 6th ID Philippine Army sa eksklusibo nga interview sang Bombo Radyo Koronadal.
Ginkilala sini ang napatay nga si Salahuddin Hassan alyas Orak, overall Amir ng Daulah Islamiya – Philippines kag asawa sini nga si Jehana Minbida, nga naga tindog nga Finance Officer sang Daulah Islamiya. Suno kay Baldomar, naka-engkwentro sang tropa sang 1st Mechanized Brigade, Philippine Army sa pagpanguna ni Col. Pedro Balisi, ang grupo ni Hasan sa Sito Pinareng, Brgy Damablac, Talayan, Maguindanao nga nagresulta sa pagkapatay sang mag-asawa.
Una diri, nakabaton sang report ang mga otoridad nga may ara sang presensya sang mga armado nga kalalakihan sa lugar , kabangdanan nga nagpatigayon sang operasyon ang mga sundalo kag kapulisan kag didto nagka-engkwentro ang magtimbang nga bahin.Bangud sa baslanay sang lupok , natam-an si Hassan kag asawa sini nga ginbilin nalamang sang ila nga mga kaupdanan sa lugar samtang nagpalagyo naman ang mga ini.
Narekober sang mga otoridad ang nagkalain-lain nga high powered firearms, mga war materials kag mga subersibo nga mga dokumento.
Nahibaluan nga si Hassan ang anay nga leader kag Founder sang notorious Al-Khobar Group nga naulamid sa nagkalain-lain nga terroristic attacks kag pagpamomba sa Mindanao. Isa man si Hassan sa mga estudyante ni anay Basit Usman kag Malaysian terrorist nga si Zulkifli Abdhir Marwan.
