KORONADAL CITY — Ginbawian sang kabuhi ang isa ka tao samtang duha naman ang pilason sa pagkasunog sang motorsiklo nga naka banga sa isa ka delivery van kahapon sang hapon sa national highway, Purok Sta. Lucia, Barangay Poblacion, Tupi, South Cotabato.
Gin kilala ni Police Staff Sergeant Joselito Sivillo, investigator sang Tupi PNP ang napatay nga si Eduardo Culanculan, 42 nga residente sang Employee’s Village, Barangay Fatima, General Santos City samtang pilason naman ang angkas sini nga si Wasaylahi, 20 kag residente man sa nasambit nga lugar.
Suno kay Sivillo, nakaangkon sang fracture sa kamot ang driver sang delivery van nga si Allan Mirafuentes Coronel, yara sa legal nga edad kag residente sang Sasa, Davao City.
Nahibaluan nga dead on arrival sa Roel I. Senador Memorial Hospital ang driver sang motorsiklo nga si Culanculan.
Nag guwa sa imbestigasyon sang Tupi PNP nga padulong sa syudad sang Koronadal ang delivery Van kag padulong sa General Santos City naman ang motorsiklo apang nag liko ini sa lane ang Kawasaki Rouser RS200 gani nakabanga sa delivery van nga Mitshubishi canter.
Sa tuman ka kusog sang impact nasunog ang motorsiklo kag nagtabog ang driver kag backrider sini.
Sa subong, nagapadayon ang imbestigasyon sa nasambit nga aksidente.
