KORONADAL CITY –Nagapadayon sa subong ang search, rescue kag retrieval operation sa missing nga padre de pamilya nga gin anod sang tubig-baha sa Barangay San Miguel, Norala, South Cotabato.
Ini ang ginkumpirmar ni MDRRMO Aiza Lin sa eksklusibo nga interbyu sang Bombo Radyo Korondal.
Suno kay Lin, ikatatlo nga adalw sa subong humalin nga gin anod sang tubig-baha ang mag amay Prudencio, 55-anyos kag Divine Grace Moreno, 14-anyos apang ang bata sini ang nakit-an nga wala sang kabuhi.
Sa subong, yara sa 200 ektarya sang tanum nga humay kag mais ang naguba sang baha halin sa 6 ka mga barangay sa ila nga banwa.
Samtang, suno naman sa Municipal Disaster Risk Reduction and Management Office sa banwa sang Banga, nakapagkit ang mga ini sang 4.85 ka ektarya sang mga tanum kag mais ang naguba, , 215 ka ektarya naman sang humay kong sa diin 342 ka mga mangunguma ang naapektuhan kag 500 pamilya ang nangin apektado.
Sa subong, ginatun-an pa sang nasambit nga banwa kong igapaidalom sa state of calamity ang mga ini.
