KORONADAL CITY – Nagapadayon sa karon ang mas madalom nga imbestigasyon sang mga otoridad sa pagpanghaboy sang granada sa estasyon sang kapulisan sa banwa sang Carmen ,North Cotabato.
Sa ekslusibo nga interbyu sang Bombo Radyo Koronadal kay PMaj. Carl Jayson Baynosa, hepe sang Carmen MPS, gin-ako sini nga wala pa sila sang may matudlo nga persons of interests ukon grupo kag maathag nga anggulo ukon motibo sa nagluntad nga pagpanghalit sa ila nga estasyon.
Suno kay Banyosa, wala naman sila sang may nabaton nga pagpanghadlok gikan sa anuman nga grupo ukon indibidwal.
Isa sa mga nakitanila nga posible nga rason amo ang asod-asod nga operasyon nga ila ginpatigayon batuk sa illegal nga droga,illegal firearms kag hugot nga pagpatuman sang curfew sa ila nga banwa bangud sa posibilidad nga pagtimalos sang pila ka mga criminal kag violators sa ila nga lugar.
Ginpasiguro man sang opisyal sa ila nga banwa nga mas pahugtan pa sang ila nga grupo ang pagpatrolya kag operasyon sa ila nga banwa bilang sabat sa nasambit nga pagpanabotahe.
Nagapasalamat naman ini bangud nga wala man sang may nareport nga pilason ukon napatay sa nasambit nga insidente.
