KORONADAL CITY – Yara na sa kustodiya sang mga otoridad ang isa ka mister matapos nga maarestar sa pagpamuno sa iya kaugalingon nga misis sa banwa sang Banga, South Cotabato.
Ini ang ginkumpirmar ni Police Major Joseph Forro, hepe sang Banga PNP sa interbyu sang Bombo Radyo Koronadal.
Ginkilala ang suspek nga si Ramon Tambon, 40-anyos nga residente sang Tampakan, South Cotabato samtang ang misis sini nga pilason amo si Lorna Linulon, 22 anyos.
Suno kay Major Forro, bangud sa sobra nga pagpangimon sang mister rason nga ginbuno sini sa likod ang biktima.
Nakaangkon pa sang mainit nga pagbaisanay ang duha antes natabo ang pagpamuno.
Pagkatapos sini naghana pa nga magpalagyo ang suspek dala ang ila 6-anyos nga bata nga ginhimo pa sini nga hostage sang nag-abot ang mga nagresponder nga BPAT’s kag kapulisan.
Nahibaluan nga hubog ang suspek rason nga nahimo sini ang krimen.
Pila ka bulan man nga wala makapauli sa ila puluy-an ang biktima rason nga naakig ang suspek kag gin-isipan sang malain ang misis.
Sa subong ginabulong na sa South Cotabato Provincial Hospital ang biktima.
