KORONADAL CITY– Nagahingyo sang bulig ang 10 ka OFWs nga stranded subong sa Jeddah, Saudi Arabia matapos nga ma-terminate sa trabaho bangud sa Economic Freeze nga naeksperiensiyahan sang nasambit nga pungsod.
Sa interbyu sang Bombo Radyo Koronadal kay Jovelyn, residente Isulan, Sultan Kudarat kag mga kaupdanan sini, luyag nila nga makapauli na sa ila tagsa ka pamiya sa Pilipinas apang expired na ang ila nga mga Iqama rason nga wala na sila maka-proseo sang Final Exit.
Suno kay Jovelyn ang pinakamasakit pa bangud ginapabay-an sila sang ila nga employer kag Agency sa nasambit nga pungsod.
Bulan sang Nobyembre pa sang nagligad nga tuig sila nadulaan sang trabaho kag nagpabilin na lamang sa accommodation kun diin pagkaon lamang ang libre sa ila.
Ang ila nga problema kun sa ano mapadal-an ang ila pamilya nga nagasalig sa ila.
Dugang pa sini, Staff House ang ila nga agency sa Pilipinas samtang A B I naman ang agency sang kaupdanan nila sa accommodation.
Sa subong luyag sang mga OFWs nga mabuligan sila sang gobyerno nga makapauli sa pungsod agud nga makaupod ang tagsa nila ka pamilya.
