KORONADAL CITY – Na-stranded sang pila ka oras ang mga motorista sa national highway sa banwa sang Makilala, North Cotabato matapos nga ginbaha ang lugar dala sang mabaskog nga bubo sang ulan kun diin naglapta man ang mga debris sa dalan.
Gilayon naman nga ginpadal-an sang road grader sang LGU-Makilala ang national highway kag ginpatigayon ang clearing operation agud makaagi ang mga motorista.
Samtang, liwat man nga nakaeksperiensiya sang malapnagon nga pagbaha ang pila ka mga banwa kasubong sang President Roxas, Pigcawayan kag Pikit sa nasambit nga probinsiya.
Nahibaluan nga nag-awas ang suba sa overflow bridge nga nagasugpon sa banwa sang Pigcawayan kag Barangay Dinganen sa Buldon, Maguindanao rason nga apektado ang mga residente nga nagapuyo sa nasambit nga lugar.
Una na nga ginpahayag ni Engr. Arnulfo Cruz, chief of operations sang North Cotabato nga nagsaka nasa masobra 3 libo nga ektarya sang pananom ang ginguba sang baha kag yara man sa P10 milyon ang inisyal nga damyos lakip na ang imprastraktura.
