KORONADAL CITY – Nagapatigayon na sang hot pursuit operations ang mga kapulisan batok sa mga miyembro sang Dawlah Islamiyah Nilong sub-group nga responsable sa pagluthang-patay sa isa ka tricycle driver sa banwa sang Polomolok, South Cotabato.
Sa interbyu sang Bombo Radyo Koronadal kay PCapt. Rommel Getalia, deputy chief of police sang Polomolok PNP, may yara na sila sang mga pangalan sa duha ka mga miyembro sang nasambit nga terror group nga nagluthang patay sa biktima nga si Eliseto Dignadice, 59 anyos kag residente sang nasambit nga banwa.
Apang wala anay ginbuyagyag ang ila pangalan agud indi makompromiso ang ila igapatigayon nga mga operasyon batok sa ila.
Suno kay Getalia, mas pahugtan pa nila ang igapatigayon nga mga operasyon batok sa ginakutaan sang mga ini sa ila nga nasakupan.
Madumdoman nga ginluthang patay sang mga suspek si Dignadice sang pakadto ini sa Crossing Palkan bangud sa pagpati nga espiya suno pa ini sang PNP.
Ginkuha man sang mga ini ang sling bag sang biktima nga may balor nga P2,000 kag nagpalagyo pakadto sa Brgy. Koronadal Proper.
Narekober sa crime scene ang anom ka basyo sang kalibre 45 kun sa diin halos tanan nga igo sang bala sa biktima ang nahamtang sa ulo.
Sa subong ginahibalo pa sang mga otoridad ang motibo sa nasambit nga krimen.
