KORONADAL CITY – Nakahan-ay na ang mga plano para sa natalana nga lubong ni Sto Nino Mayor Pablo Matinong Jr buwas nga adlaw, Agosto 1.
Kaangot sini, hugot sa gihapon ang presensiya sang mga kapulisan kag mga barangay officials agud nga masiguro ang seguridad kag mangin man ang pagtuman sa mga minimum health standards nga gintalana sang Department of Health.
Suno kay Sto NIno Municipal Administrator Jofrey Frenal, magaumpisa ang misa alas 7:30 buwas sa aga, kun sa diin igahapit pa ini sa municipal hall para sa last viewing antes pagadal-on sa public cemetery kun sa diin igahaya na sa ulihi nga palahuwayan si Mayor Abog sa iya nga mausoleo.
Nagpangabay man ini sa mga kalakip sa vulnerable sector kasubong sang mga tigulang, nagabusong, may balatian kag mga kabataan nga magpabilin na lamang sa balay kag ipangamuyo si Mayor Matinong agud indi magtinumpok sa adlaw sang lubong.
Samtang nagapadayon sa gihapon ang imbestigasyon sang mga otoridad angot sa riding-in-tandem criminals nga nagluthang patay kay Mayor Abog, kun sa diin lunsay napasakaan na ang mga ini sang kaso nga murder.
