KORONADAL CITY – Tuman nga ginapabugal sang South Cotabateños ang duha sa mga kandidata nga nag-intra sa prestihiyoso nga Miss Earth 2020 apesar wala nangin mapalaron ang mga ini nga magdaog kag nangin runner-ups lamang.
Kaangot sini, ginsaysay nanday Miss Philippines Earth 2020 delegates Arielle Jazmine Roque sang General Santos City kag Alayyza Izzabelle Tolimao sang probinsya sang South Cotabato ang ila nangin eksperyensiya sa nasambit nga pageant.
Nangin hugot suno pa ang ila nga diet kag tuman ang ila nga preparasyon sa presentasyon sa ila mga videos, apang gin-ako sang mga ini nga nakaangkon man sila sang pila ka mga hangkat kasubong sang kakulangon sang resources apang nalampuwasan man.
Sa pihak nga bahin, ginakabig nga overwhelming experience para kay Alyzza ang nasambit nga paindis-indis, kun sa diin plano niya anay nga magpahuway sa pageantry agud magtutok sa journalism, samtang pagaatipanon naman ni Arielle ang iya pamilya, apang nagapabilin nga abri sa mga oportunidad.
Sa ulihi lunsay nagpasalamat ang mga ini sa mga tawo nga nagbulig sa ila agud makalab-ot sa ila ginakahamtangan subong kag mangin man sa Bombo Radyo sa pagpaambit sang ila naagyan.
Kun madumdoman ginkoronahan nga Miss Philippines Earth 2020 si Roxanne Allison Baeyens sang Baguio City.
