BANGA, SOUTH COTABATO – Tigayon na nga napasakaan sang patong-patong nga kaso ang massacre suspect nga nagpatay sa kaugalingon sini nga mga himata sa Prk. Pag-asa, Brgy Rizal, Banga, South Cotabato kun sa diin ginkapilas man ini sang apat nga iban pa.
Suno kay Police Major Joseph Forro III, ang hepe sang Banga PNP, ginpasakaan sang mga kaso ang suspek nga si Gido Blatang alyas Paul Bautista nga ginalakipan sang parricide bangud sa paglabo-patay sa iya asawa nga si Monlene Bautista, 3 counts nga murder kag 3 counts man sang frustrated murder.
Apang sa pihak nga bahin, apesar nga yara na ini sa ila kustodya, padayon nila sa gihapon nga ginatutokan ilabi na nga nagasuprer ini sang tuberculosis lakip man ang iya inmate nga kabahin niya sa selda.
Gindugang ni Major Forro nga regular sila nga nagahatag sang mga vitamins, supplement kag mga checkup sa ila agud mamonitor ang kondisyon sang ila ikaayong lawas.
Sa subong nagahulat na lamang sila sang commitment order agud tigayon na ini nga masaylo sa South Cotabato Provincial Detention and Rehabilitation Center.
