KORONADAL CITY – Nagakabalaka ang mga pumuluyo sa Kenya nga posible nga maglala pa ang pamahog sang coronavirus sa ila pungsod.
Sa interbyu sang Bombo Radyo Koronadal kay Chris Jun Tabiling, isa ka misyonaryo sa nasambit nga pungsod, madamo nga mga Kenyans ang nagakahangawa sa pag-contain sang nasambit nga virus labi pa nga kulang sila sa sanitation kag tubig.
Dugang ni Tabiling, magluwas sa covid-19, problema man nila ang paglala sang iban pa nga balatian kasubong sang cholera, HIV, malaria kag diarrhea sa siyudad sang Kibera.
Gin-ako man sang gobyerno nga posible nga indi na nila masarangan ang problema kun maglab-ot ini sa nasambit nga siyudad.
Nahibaloan nga humalin sang napagkit ang una nga kumpirmado nga kaso sang covid-19 sang Abril 15, gilayon nga nagpatuman ang Kenya sang lockdown, curfew, suspension sang klase kag pagpatuman sang quarantine protocols.
Mas ginpalapad man ang mga tikang sa pag-contact trace sa 3,000 ka mga indibidwal nga mahimo nakasapol sang mga nagpositibo.
Base sa datos, napagkit na sa 281 ang kaso sa pungsod kun sa diin 14 ang napatay samtang 69 naman ang nag-ayo.
