Anom nga panibag-o nga myembro sang Bangsamoro Islamic Freedom Fighters-Bungos Faction ang nagsungka sa Alpha Company Base sang Army’s 33rd Infantry Battalion, sa Barangay Mileb, Rajah Buayan, Maguindanao.
Ginkilala ang mga nagsungka nga rebelde nga sanday Naldo Balabay, Nashrudin Kanapia, Abil Kusain, Dok Adam, Alamansa Manampad kag Antok Pendatun.
Ginsungka man sang mga ini ang mga dala nga armas luthang kasubong sang Cal. 30 M-1 Garand rifles nga M-14 converted, isa ka improvised Cal .30 sniper rifle, isa man ka improvised Cal. 50 sniper rifle kag duha ka improvised 40mm M79 Grenade Launchers.
Gindala naman ang mga nasambit nga nagsungka nga mga indibidwal sa Army’s 33rd IB headquarters para sa custodial debriefing.
Samtang, narekober naman sang gintingob nga pwersa sang mga suldado kag mga katapo sang Moro Islamic Liberation Front o MILF ang duha ka Improvised Explosive Devices sa ginpatigayon nga clearing operation sa Sitio Dungguan kag Sitio Dama Kayo, Barangay Kalumamis, Guindulungan, Maguindanao.
Suno kay Joint Task Force Central commander Major Gen. Diosdado Carreon, gilayon naman gindala sang Army’s 7th Infantry Battalion ang mga IEDs ila tactical command post kag nakipagbuliganay sa Explosive Ordnance Battalion para sa proper identification, evaluation kag disposal sini.
Sa subong, padayon nila ginabantayan ang lugar batuk sa lawless groups sa pihak sang nagapadayon nga community quarantine.
