KORONADAL CITY – Ginpakigbahin sang Pinay caregiver sa Amerika nga isa ka COVID survivor ang iya eksperyensiya makaligad malatnan sang virus kag mag-ayo sa nasambit nga balatian.
Sa ekslusibo nga interbyu sang Bombo Radyo Koronadal kay Bombo International Correspondent Genevieve Corneta residente sang Florida, USA sa sulod na sang 29 ka tuig kag tumandok sang Surallah, South Cotabato, indi nangin mahapos para sa iya ang pagrekober sa nasambit nga balatian.
Suno sa iya, isa niya ka abyan kag upod sa obra ang una nga nagpositibo sa covid gani wala siya nakaluwas kag nalatnan man kag sa kadugayan nakabatyag sang mga sintomas kasubong sang ubo, lagnat kag diarrhea.
Apang sa baylo nga madulaan sang paglaum, nangin determinado siya nga mag-ayo pinaagi sa pagpabaskog sa iya immune system.
Gin-isolate niya ang iya kaugalingon sa iban mangin sa iya pamilya kag adlaw-adlaw nga nagainom sang coconut oil, ginpabukalan nga luy-a nga may kalamansi mangin man ang pagkaon sang mga masustansiya nga pagkaon.
Aminado siya nga bilang caregiver, indi siya mahimo mag-obserbar sang social distancing gani sa subong nga nakabalik na ini sa obra, husto nga personal protective equipment, mabaskog nga immune system kag sinsero nga pagpangamuyo sa Makaako ang iya kaupod.
Kadungan sini, nagapanawagan man si Corneta sa mga Pilipino nga tumanon ang protocol sa social distancing kag buligan ang gobyerno nga malampuwasan ang krisis nga ini.
