KORONADAL CITY – Temporaryo nga ginpalayo anay sa mga ginikanan ang yara sa 60 estudyante kag manunudlo nga naghalin sa Northern Luzon makaligad magtambong sa National Schools Press Conference (NSPC) sa Tuguegarao kag National Festival of Talents (NFOT) sa Ilagan, Isabela.
Sa interbyu sang Bombo Radyo Koronadal kay Ms. Delia Mabalot, Education Program Supervisor School-Based Managementor sang DepED City Division, ginakabalak-an nga posible nga nakaagi sila sa isa ka lugar nga may exposure sang coronavirus, apisar may suksok sila nga facemask gani igapaidalom sila sa 14 days quarantine agud nga malikawan ang paglapta sini.
Suno kay Mabalot, malawig ang biyahe nga ila naagyan apisar may mga preventive measures apang mas maayo gid nga magpaidalom sa quarantine ang mga ini.
Una diri, nangin emosyonal gani ang mga estudyante matapos nga makapauli na sa siyudad sang Koronadal matapos nga mastranded bangud naabtan sang lockdown sa Metro Manila.
Antes ang quarantine, ginpaidalom man sa orientation sang Joint Task Force Covid-19 sang siyudad ang mga ini lakip na ang ila mga ginikanan.
Ang nasambit nga mga estudyante kag manunudlo ang yara subong sa isa ka buluthuan kag nagapaidalom sa 14 days quarantine.
