KORONADAL CITY – Suportado sang kadam-an sa mga overseas Filipino workers sa Kuwait ang total deployment ban nga ginpatuman sang gobyerno sang Pilipinas.
Ini makaligad gin-aprubahan sang Philippine Overseas Employment Agency (POEA) ang pagpatuman sang nasambit nga pagsulondan kasunod sang kamatayon ni Jeanelyn Villavende sadtong Disyembre 2019.
Sa eksklusibo nga interbyu sang Bombo Radyo Koronadal kay Mai Mahinay Ayoso, isa ka Domestic Helper nga kapin isa ka dekada na sa Kuwait kag residente sang Sitio Cogonal, Brgy Topland, Koronadal City, ginpahayag sini nga suportado niya sa total deployment ban bangud mangin leksyon man ini sa mga employer nga mahiligon magmaltrato sang mga Domestic Helper.
Wala suno pa ginatuman sang mga Kuwaiti ang kontrata bangud nagapangibabaw ang layi nila bilang employer.
May yara suno pa sila sang ‘kafala system’ kun sa diin mahimo ibalik sa agency sa sulod sang tatlo ka bulan ang isa ka OFW kun sa diin indi sini naluyagan sang iya employer apang wala ginatuman sang iban nga Kuwaiti kag ginabaligya pa ang iban nga Pinay worker sa ila kasimanwa.
Suno kay Ayoso, halos tanan sa mga Kuwaiti ang nagapati nga kwarta lamang ang makasabat sa kamatayon ni Jeanelyn Villavende.
Gani nagakadapat nga makuha lamang suno pa ang hustisya sa nadangtan ni Jeanelyn bangud indi lamang siya ang Pinay worker nga magpauli nga wala na sang internal organs.
